ҚР денсаулық сақтау саласындағы мемлекеттік сатып алуды құқықтық реттеу

Аңдатпа

Мақалада Қазақстан Республикасындағы денсаулық сақтау саласындағы мемлекеттік сатып алуды құқықтық реттеудің ағымдағы жай-күйі қарастырылады. Денсаулық сақтау саласында бюджет қаражатын үнемдеу үшін мемлекеттік сатып алу механизмін қолданудың өзектілігі дәлелденді. Автор осы саладағы құқықтық реттеудің оң жақтары мен кемшіліктерін қарастырады. Мемлекеттік сатып алудың шетелдік тәжірибесі талданды. Автор Қазақстан Республикасының денсаулық сақтау саласындағы мемлекеттік сатып алуды құқықтық реттеуді жетілдіру бойынша ұсыныстарды тұжырымдаған. Қазақстан Республикасының қазіргі денсаулық сақтау саласының маңызды міндеттерінің бірі денсаулық сақтау органдарын дәрілік заттармен және медициналық техникамен қамтамасыз ету үшін мемлекеттік қаржы ресурстарын пайдалану тиімділігін арттыру болып табылады. Денсаулық сақтауды мемлекеттік реттеу құралдарының бірі мемлекеттік сатып алу жүйесінің жұмыс істеуі болып табылады. Мемлекеттік сатып алу келешегі зор және маңызды реттеуші рөлін атқарады, ол арқылы халыққа медициналық көмек көрсетуде толыққанды бәсекелестік ортаны қалыптастыруға, осы салада тұрақтандыру саясатын жүзеге асыруға болады.